ENERXÉTIKA 2020 prepárase para ser o gran foro do sector da enerxía entre o 26 e o 28 de marzo
A Feira Internacional de Galicia ABANCA (Silleda, Pontevedra) volverá converterse en espazo de referencia para o sector da enerxía. Será do 26 ao 28 de marzo de 2020 coa celebración de ENERXÉTIKA, nome da ata agora Feira da Enerxía de Galicia. Un certame que renova a súa denominación para non acoutar o evento e adecuarse así á súa importante evolución e a unha crecente internacionalización que permitiu xa cumprir os requisitos necesarios para solicitar o selo de internacionalidade que outorga o Ministerio de Industria, Comercio e Turismo.
ENERXÉTIKA, que conta co apoio da Xunta de Galicia a través da Consellería de Economía, Emprego e Industria, reforzará o seu valor como punto de encontro para empresas, institucións, profesionais e consumidores. Así, negocio, innovación, análise e divulgación serán os eixos dun foro imprescindible ante o momento excepcional e determinante que vive o sector da enerxía.
Nesta terceira edición a feira seguirá a súa máxima de constituírse nunha gran mostra, con todos os ámbitos e tipos de enerxía na súa exposición: desde enerxías convencionais e renovables ata eficiencia enerxética, mobilidade sustentable, material e equipos para instalacións, electrónica industrial, iluminación, servizos, institucións, asociacións e formación. Neste sentido, o obxectivo da organización é seguir aumentado a presenza expositiva, tanto en número de empresas e entidades como en superficie ocupada.
Será así unha gran oportunidade para dar a coñecer o presente e o futuro do sector no seu conxunto, presentando aos profesionais as tecnoloxías e prototipos vinculados ao cambio de paradigma enerxético e informando ao consumidor final.
Un programa que volverá superarse
O programa de actividades desta feira tense convertido nun dos seus distintivos. Xa como ENERXÉTIKA incidirá aínda máis na súa atractiva formulación. Destacarán as propostas orientadas a profesionais pero ao mesmo tempo será unha ferramenta con gran valor informativo, formativo e pedagóxico.
As xornadas técnicas seguirán sendo protagonistas, con temas de máxima actualidade que serán debullados por relatores de recoñecido prestixio, os cales achegarán unha interesante visión da situación e os retos do sector. Abordaranse, entre moitos outros, a transición enerxética, mobilidade sustentable, aforro e eficiencia, bioconstrución, seguridade industrial, coxeración ou economía circular.
Sumaranse outras propostas que potenciarán o salón como espazo de converxencia de todos os axentes implicados no ámbito enerxético. Así, ademais dalgunhas novidades cuxa incorporación está a ser estudada, levaranse a cabo diversos talleres, presentacións tanto de proxectos como de produtos e asembleas de colectivos con gran importancia dentro do sector.
Tamén se habilitará na zona exterior do recinto un circuíto de mobilidade alternativa no cal os visitantes poderán probar e coñecer as prestacións de distintos vehículos eléctricos, híbridos e de gas. Unha proposta que conta gran éxito entre os asistentes, os cales mostran gran interese por coñecer as prestacións destes modelos.
Unha cita en crecemento
Se na súa edición de partida o certame superou as previsións, na segunda deu un decidido paso á fronte para a súa consolidación. A súa área expositiva contou con 255 firmas (un 5,8% máis) de 20 países, das cales 104 foron expositores directos (un 11,8% máis) de España, Portugal, Alemaña e Bulgaria. As empresas estranxeiras duplicáronse e a súa superficie neta sumou 5.479 m² (un 27,6% maior).
En canto aos visitantes que recibiu o salón durante os seus tres días, ascenderon a 6.235, un 13,3% máis. Rexistrouse público de practicamente todas as comunidades autónomas e tamén doutros países, na súa maioría de Portugal, pero tamén de Francia, Suíza, Uruguai, Dinamarca e Reino Unido. Acudiron profesionais e tamén estudantes e consumidores interesados en coñecer novidades.
O seu programa destacou pola amplitude das súas propostas e a participación do público. Desenvolvéronse 86 conferencias agrupadas nun total de 29 xornadas, organizadas por diversas empresas e tamén destacada entidades, como o Instituto Enerxético de Galicia (Inega); Instituto Iberoamericano de Ingenieros de la Energía, Escola de Enxeñería de Minas e Enerxía da Universidade de Vigo, Asociación Española de Valorización Energética de la Biomasa (Avebiom), Consellería de Cultura, Educación e Ordenación Universitaria, Federación Galega de Instaladores Eléctricos e Telecomunicacións (Fegasinel) e os clústers galegos Agaen e Acluxega. Conducidas por 91 profesionais de máis de 60 entidades, algúns dos aspectos nos que profundaron foron as Directrices Enerxéticas de Galicia 2018-2020, biomasa, autogás, softwares de xestión enerxética, aerotermia, edificios de consumo case nulo, o proxecto Core LNGas hive, mobilidade sustentable, autoconsumo, xeotermia, biogás, coxeración ou hibridación.
Ademais, non faltaron espazos divulgativos como o da Fundación Sotavento Galicia e o Inega, circuítos, talleres ou encontros sectoriais como o da Asociación Española de Empresas Produtoras de Pellets (Apropellets), a Federación Galega de Municipios e Provincias (Fegamp), a Asociación de Empresas do Cerramento de Galicia (Aecalpo), Fegasinel e tamén o dos clústers da enerxía de Galicia, no que participaron o do Autoconsumo e da Eficiencia Enerxética (Agaen), o de Enerxías Renovables de Galicia (Cluergal) e o da Xeotermia Galega ( Acluxega).
Respaldo do sector
Os resultados do certame en 2018 supuxeron que a satisfacción de expositores e visitantes fose en aumento, ademais de gañarse de novo o apoio dun destacado comité organizador, encabezado pola Dirección Xeral de Enerxía e Minas da Xunta de Galicia e conformado por máis dunha trintena de entidades e empresas de gran relevancia no ámbito enerxético:
- Dirección Xeral de Enerxía e Minas –Consellería de Economía, Emprego e Industria
- Dirección Xeral de Educación, Formación Profesional e Innovación Educativa – Consellería de Educación, Universidade e Formación Profesional
- Inega – Instituto Enerxético de Galicia
- Igape – Instituto Galego de Promoción Económica
- Icex – España Exportación e Inversiones
- Gain (Axencia Galega de Innovación)
- Apyde (Asociación de Produtores e Distribuidores de Enerxía de Galicia)
- Asociación Eólica de Galicia
- Agaen (Clúster Galego do Autoconsumo Enerxético)
- Cluergal (Clúster Enerxías Renovables de Galicia)
- Acluxega (Asociación Clúster da Xeotermia Galega)
- Asociación Forestal de Galicia
- Confemadera (Confederación Galega de Empresarios da Madeira)
- Clúster da Madeira e o Deseño de Galicia
- Consello Galego de Enxeñeiros Técnicos Industriais
- Colexio Oficial de Enxeñeiros Industriais de Galicia
- Colexio Oficial de Arquitectos de Galicia
- Colexio Oficial de Aparelladores, Arquitectos Técnicos e Enxeñeiros de Edificación
- Confederación de Empresarios de Galicia
- Fegafón (Federación Galega de Asociacións Provinciais Empresariais de Fontanería, Calefacción, Gas, Climatización, Mantemento e Afíns)
- Fegasinel (Federación Galega de Asociacións de Instaladores Eléctricos e Telecomunicacións)
- Fegape (Federación Galega de Parques Empresariais)
- Aecalpo (Asociación de Empresas do Cerramento de Galicia)
- Energylab (Centro Tecnolóxico de Eficiencia e Sustentabilidade Enerxética)
- Avebiom (Asociación Española de Valorización Energética de la Biomasa)
- Naturgy
- Repsol Refinería
- Repsol Gas
- Reganosa (Regasificadora del Noroeste)
- Iberdrola
- Endesa Generación
- Red Eléctrica
- Engasa Eólica
- Setga
- Ecoforest
- Biomasa Forestal
- Greenalia
- Ence Energía y Celulosa
- Abanca
